New Delhi: Delhi ke Jantar Mantar par pichhle ek mahine se zyaada samay se chal raha aitihasik student protest ab aadhikarik roop se samapt ho gaya hai. Cockroach Janata Party (CJP) aur student leaders ne kendre sarkar ke sath hui safal baatchit ke baad is andolan ko wapas lene ka ailan kiya hai. Sarkar dwara chhatron ki sabse mukhya maangon ko swikaar karne ke baad dharna sthal par jashn ka mahaul dekha gaya.
Is poor andolan ki sabse badi jeet Union Education Minister Dharmendra Pradhan ka istifa rahi. NEET-UG paper leak aur exam irregularities ke mudde par badhte dabav ke beech unhone apna pad chhod diya. President dwaara unka istifa manzoor karne ke baad student unions ne ise chhatra shakti ki ek aitihasik safalta bataya. Iske sath hi Pralhad Joshi ko Shiksha Mantralay ka naya karya bhar saumpa gaya hai.
Govt aur CJP leaders ke beech hui teesre daur ki meeting mein baaki bachi maangon par bhi sahmati ban gayi. Sarkar ne aashwasan diya hai ki shantipurna roop se pradarshan kar rahe chhatron par darj sabhi FIRs aur legal cases ko wapas liya jayega. Iske ilawa, paper leak aur exam pressure ke kaaran jaan gawanewale chhatron ke parivar ko uchit muawza (compensation) dene aur examination system mein bade reforms laane ke liye aage ki baatchit jaari rakhne par dono paksh raazi hue hain.
Ailan ke turant baad Jantar Mantar ko khali karwane ka kaam shuru kar diya gaya. NDMC ke swachhata karmchariyon ne raton-rat pure protest area ko saaf kiya, jismein pichhe bache chhatro ne bhi apna yogdan diya. Police barricades hata diye gaye hain aur central Delhi mein traffic aawajahi ab aam dino ki tarah samanya ho gayi hai.